सशस्त्र सीमा बलातील जवानाचा सन्मान; जव्हारचा अभिमान उंचावला

जव्हार, दि.१; प्रतिनिधी

देशाच्या सीमांचे रक्षण करण्यासाठी कार्यरत असलेल्या भारतीय सशस्त्र सीमा बलात (एसएसबी) सेवा बजावत असलेल्या जव्हार तालुक्यातील गणेश नगर (डबकपाडा) येथील शेतकरी कुटुंबातील जवान योगेंद्र राऊत यांच्या कार्याचा गौरव मंगळवारी केंद्रीय गृहसचिव गोविंद मोहन यांच्या हस्ते नवी दिल्ली येथे करण्यात आला. त्यांच्या उल्लेखनीय सेवेमुळे परिसरातून त्यांच्यावर अभिनंदनाचा वर्षाव होत असून, त्यांच्या कार्यामुळे जव्हार तालुक्याच्या शिरपेचात मानाचा तुरा खोवला गेला आहे.
सशस्त्र सीमा बल हे देशाच्या अंतर्गत सुरक्षेसह सीमावर्ती भागातील सुरक्षेची जबाबदारी सांभाळणारे महत्त्वाचे दल आहे. अशा जबाबदारीच्या दलात कार्यरत राहून देशसेवेचे व्रत स्वीकारणाऱ्या जवानांचे योगदान अत्यंत मोलाचे आहे. प्रतिकूल परिस्थितीतही कर्तव्याला सर्वोच्च प्राधान्य देत देशाच्या सुरक्षेसाठी अहोरात्र कार्य करणाऱ्या जवानांबद्दल समाजात नेहमीच आदराची भावना असते.
ग्रामीण व आदिवासीबहुल जव्हार तालुक्यातील युवकाने देशसेवेच्या क्षेत्रात आपली ओळख निर्माण केल्याने स्थानिक युवकांसमोर प्रेरणादायी आदर्श निर्माण झाला आहे. कुटुंबीयांसह ग्रामस्थांनी त्यांच्या यशाबद्दल आनंद व्यक्त केला असून, पुढील वाटचालीसाठी शुभेच्छा दिल्या आहेत.“तुमचा हा सन्मान हा केवळ तुमचा नसून, आमच्या गावाचा, आई-वडिलांचा आणि संपूर्ण देशाचा अभिमान आहे,” अशा भावना ग्रामस्थांनी व्यक्त केल्या. जवान योगेंद्र राऊत यांना पालघर लोकसभा खासदार डॉ. हेमंत सवरा, आमदार हरिश्चंद्र भोये यांनीदेखील अभिमान पर शुभेच्छा दिल्या.