28 ते 30 सप्टेंबर बँक कर्मचाऱ्यांचा संप? सरकारकडून संप मागे घेण्याचे आवाहन; ग्राहकांवर सलग 5 दिवस परिणामाची शक्यता

नवी दिल्ली | DO Reports

देशभरातील बँक ग्राहकांसाठी महत्त्वाची बातमी समोर आली आहे. युनायटेड फोरम ऑफ बँक युनियन्स (UFBU) आणि संबंधित संघटनांनी 28 ते 30 सप्टेंबर 2026 दरम्यान देशव्यापी बँक संपाची घोषणा केली आहे. या पार्श्वभूमीवर केंद्रीय अर्थ मंत्रालयाने बँक कर्मचाऱ्यांना संपाचा मार्ग न स्वीकारता प्रलंबित मागण्या चर्चेतून सोडवण्याचे आवाहन केले आहे.

नेमकी मागणी काय?
बँक कर्मचाऱ्यांच्या संघटनांकडून प्रामुख्याने आठवड्यात पाच दिवस बँकिंग सेवा सुरू ठेवण्याची मागणी करण्यात आली आहे. याशिवाय वेतनविषयक आणि पेन्शनशी संबंधित काही मागण्यांचाही संघटनांकडून पाठपुरावा करण्यात येत आहे. यापूर्वी 11 सप्टेंबर रोजीही या मागण्यांसाठी देशव्यापी एकदिवसीय संप झाला होता. आता 28, 29 आणि 30 सप्टेंबर या तीन दिवसांसाठी पुन्हा संपाची घोषणा करण्यात आली आहे. युनियनच्या प्रमुख मागण्यांपैकी Performance Linked Incentive (PLI) योजनेबाबत सरकारने या महिन्याच्या सुरुवातीला ती पुढील निर्णयापर्यंत स्थगित ठेवण्याचा निर्णय घेतल्याचे अर्थ मंत्रालयाने म्हटले आहे. मात्र पाच दिवसांच्या बँकिंग वर्किंग वीकची मागणी अद्याप चर्चेत असून, त्याबाबत विचार सुरू असल्याचे सरकारने स्पष्ट केले आहे.

ग्राहकांसाठी महत्त्वाचे का?

28 ते 30 सप्टेंबरचा प्रस्तावित संप 30 सप्टेंबरच्या बँकांच्या सहामाही आर्थिक वर्षअखेरच्या कामकाजाच्या कालावधीत येत आहे. या काळात बँकांमध्ये reconciliation, provisioning, treasury आणि market operationsसारखी महत्त्वाची कामे केली जातात. त्यातच 26 सप्टेंबर हा महिन्याचा दुसरा शनिवार असून बँक सुट्टी आहे, तर 27 सप्टेंबरला रविवार आहे. त्यामुळे संप झाला तर शाखांमधील प्रत्यक्ष बँकिंग सेवा 26 ते 30 सप्टेंबरदरम्यान सलग पाच दिवस प्रभावित होण्याची शक्यता आहे.

डिजिटल बँकिंग सेवा सुरू राहणार

संपामुळे शाखांमधील प्रत्यक्ष कामकाजावर परिणाम होण्याची शक्यता असली तरी ATM, UPI, Mobile Banking, Internet Banking आणि इतर डिजिटल माध्यमांचा वापर ग्राहकांना करता येणार आहे. SBI आणि Union Bankसह काही बँकांनी ग्राहकांना महत्त्वाची शाखेशी संबंधित कामे संपाच्या आधी पूर्ण करण्याचा सल्ला दिला आहे.

सरकारचे कर्मचाऱ्यांना आवाहन

अर्थ मंत्रालयाने म्हटले आहे की, बँकिंग सेवा अखंडित राहणे ग्राहक, व्यवसाय, सरकारी व्यवहार आणि इतर आर्थिक व्यवहारांसाठी महत्त्वाचे आहे. त्यामुळे उर्वरित मागण्यांवर चर्चा आणि संवादातून तोडगा काढावा, असे आवाहन सरकारने केले आहे. दरम्यान, 22 सप्टेंबर रोजी झालेली सलोखा बैठक निष्फळ ठरल्यानंतर UFBUने 28 ते 30 सप्टेंबरचा संप सुरू ठेवण्याची भूमिका घेतल्याचे वृत्त आहे. त्यामुळे येत्या काही दिवसांत सरकार आणि बँक कर्मचारी संघटनांमध्ये होणाऱ्या चर्चेकडे ग्राहकांचे लक्ष लागले आहे.