Monday Again : सोमवारी कामाला जायचा कंटाळा येतोय? हे करून पाहा!

सोमवारची सकाळ…अलार्म वाजतो आणि पहिला विचार येतो, “आज पुन्हा ऑफिस…” घाईघाईने तयार व्हायचं, बसस्टॉपवर पोहोचायचं, बससाठी रांग, कधी बसमध्ये गर्दी तर कधी रस्त्यावर ट्रॅफिक. लोकलने जाणाऱ्यांचीही काही वेगळी परिस्थिती नसते. स्टेशनवरची गर्दी, धावपळ आणि ट्रेनमध्ये जागा मिळवण्याची कसरत… ऑफिसला पोहोचेपर्यंतच दिवसाची बरीच ऊर्जा खर्च झालेली असते आणि मग कामाचा ताण वेगळाच! त्यामुळे सोमवारी कामाला जायचा कंटाळा येणं साहजिक आहे. पण रोजचा हा प्रवास आणि त्यातून येणारा ताण थोडा कमी करण्यासाठी काही छोट्या गोष्टी नक्की करून पाहता येतील. प्रवासाचा वेळ ‘फक्त प्रवास’ राहू देऊ नका. बस किंवा लोकलमध्ये बसायला जागा मिळाली तर छानच; पण उभं राहावं लागलं तरी प्रत्येक मिनिट ऑफिसच्या विचारात घालवण्याची गरज नाही. कानात हेडफोन लावा आणि तुमचं आवडतं संगीत ऐका. एखादा पॉडकास्ट ऐका किंवा काही हलकंफुलकं ऐका. ऑफिस सुरू होण्याआधीच मनाने ऑफिसमध्ये पोहोचण्याची गरज नाही. ट्रॅफिकमध्ये अडकलात? स्वतःवर चिडू नका. सकाळी रस्त्यावर ट्रॅफिकमध्ये अडकणं आपल्या हातात नसतं. पण त्या 20-30 मिनिटांत सतत घड्याळाकडे पाहत राहणं, हॉर्नचा आवाज ऐकून चिडणं आणि “आज उशीर होणार” म्हणून स्वतःचा मूड खराब करणं मात्र टाळता येऊ शकतं. शक्य असेल तर घरातून थोडं लवकर निघा. आणि ट्रॅफिक लागलाच तर तो वेळ शांतपणे स्वीकारा. ट्रॅफिक कमी करण्याची ताकद आपल्या हातात नसते; पण त्याचा आपल्या मूडवर किती परिणाम होऊ द्यायचा, हे आपल्या हातात असतं. सोमवारी स्वतःवर जास्त काम लादू नका. आठवड्याच्या पहिल्याच दिवशी सगळी प्रलंबित कामं संपवायची असा हट्ट करू नका. ऑफिसमध्ये पोहोचल्यानंतर आधी महत्त्वाची कामं ठरवा. एक काम पूर्ण करा आणि मग दुसऱ्याकडे वळा. सकाळपासून “आज खूप काम आहे” असं स्वतःला सांगत राहिलं की काम सुरू करण्याआधीच थकवा येतो. बस किंवा लोकलमध्ये उभं असतानाही एक छोटा ब्रेक घ्या. प्रवासात गर्दी असली तरी दोन मिनिटं मोबाईल बाजूला ठेवा. शांतपणे श्वास घ्या, आज काय करायचं आहे याचा विचार करा आणि स्वतःला mentally तयार करा. ऑफिसच्या दारात पोहोचेपर्यंत स्वतःला मानसिकदृष्ट्या थकवू नका. सोमवारनंतर स्वतःसाठी काहीतरी ठेवा, सोमवार म्हणजे फक्त ऑफिस, काम आणि परत घर असा दिवस नको. ऑफिस सुटल्यानंतर आवडता चहा, एखादा मित्र, थोडं फिरणं, आवडतं जेवण किंवा घरी कुटुंबासोबत वेळ असे काहीतरी छोटंसं स्वतःसाठी ठेवा. मग सोमवारकडे पाहताना फक्त “कामाचा दिवस” दिसणार नाही. शेवटी एक गोष्ट लक्षात ठेवा… आपल्यापैकी अनेकांचा दिवस ऑफिसमध्ये नाही, तर घरातून बाहेर पडल्यापासूनच सुरू होतो. बसची वाट पाहताना, लोकल पकडताना, गर्दीत उभं राहताना किंवा ट्रॅफिकमध्ये अडकताना आपण रोज कित्येक मिनिटं आणि तास घालवतो. हा प्रवास पूर्णपणे आपल्या नियंत्रणात नसतो. पण या प्रवासामुळे आपला संपूर्ण दिवस खराब होऊ नये, एवढं मात्र आपण नक्की करू शकतो. पुढच्या सोमवारी अलार्म वाजल्यावर स्वतःला “पुन्हा सोमवार आला!” असं म्हणण्याऐवजी एकदा एवढंच म्हणा “चला… आणखी एक आठवडा. यावेळी स्वतःसाठी थोडा सोपा करूया!”